Bólusetningarleið yfirvalda var byggð á óskhyggju og sú leið hefur nú algjörlega beðið skipbrot. Þetta var meðal þess sem fram kom í máli Jóhannesar Loftssonar og Helga Arnar Viggóssonar fulltrúum stjórnmálaflokksins nýstofnaða sem hefur fengið nafnið Ábyrg framtíð, í síðdegisútvarpinu í dag en þeir voru gestir Arnþrúðar Karlsdóttur.
Jóhannes segir stjórnvöld hafa talað gegn betri vitund þegar því var lofað að þeir sem myndu láta bólusetja sig myndu verða varðir gegn smiti því vitað hafi verið allan tímann að bólusetning kæmi ekki í veg fyrir smit, og það sem meira er að framleiðendur bóluefnanna hafi greint frá því áður en bólusetningar hófust.
Þeir Jóhannes og Helgi segja að undarlegt sé að bólusetningarleiðin hafi verið farin því þeir sem reynt hafi að framleiða bóluefni gegn kórónaveirum undanfarin ár hafi alltaf strandað á þeirri þróunarvinnu þegar kom að því að prófa bóluefnin á dýrum. Við þróun Covid bóluefnanna hafi dýratilraununum einfaldlega verið sleppt nánast alveg, fyrir utan átta apa sem nýttir hafi verið til prófanna. Þá hafi engar langtímarannsóknir farið fram og ekkert sé vitað um framtíðaráhrif bólusetninganna á fólk.
Sóttvarnaráð ekki kallað saman og getur því ekki sinnt lögbundnu hlutverki sínu
Fram kom í þættinum að Þórólfur Guðnason sóttvarnalæknir hefði átt við þessar aðstæður sem nú séu uppi í samfélaginu að kalla Sóttvarnaráð saman svo það gæti sinnt lögbundnu hlutverki sínu, sem sé að móta stefnu í sóttvörnum og vera stjórnvöldum innan handar til ráðgjafar um aðgerðir til varnar útbreiðslu smitsjúkdóma. Það hafi Þórólfur hins vegar ekki gert, en þess í stað hafi hann sett málin beint í hendur stjórnvalda
Þá benda þeir á að rannsóknir lyfjafyrirtækjanna á aukaverkunum og virkni lyfjanna séu ekki trúverðugar af augljósum ástæðum, en eins og allir vita hafa lyfjafyrirtækin fjárhagslega hagsmuni af því að niðurstöður rannsókna séu þeim hliðhollar.
Þeir gagnrýna einnig að ekki sé gripið fyrr inn í með fyrirbyggjandi aðferðum, leið yfirvalda felist í að banna allt annað en bóluefni í baráttunni við faraldurinn og kalla þeir eftir frelsi í þeim efnum og telja að með frelsi fólks til þess að velja muni verja viðkvæma hópa mun betur.
Hagsmunaaðilar fengnir sem álitsgjafar hjá Ríkisfjölmiðlinum
Þá undrast þeir viðmælendaval Ríkisútvarpsins þegar kemur að faraldrinum og bólusetningum og benda þeir á að í fyrrakvöld hafi verið rætt þar við konu sem heitir Ingileif Jónsdóttir en hún er líffræðingur og kennari við Haskóla Íslands, en þar kaus RÚV að láta þess ógetið að hún væri starfsmaður Decode sem á beinna hagsmuna að gæta.
Hlusta má á viðtalið í spilaranum hér að neðan
