Fræðasamfélagið hefur linnulaust verið að markaðssetja orðið hægri öfgamaður og jafnvel tengt það við Breivik allt frá því að lögreglan tilkynnti í gær að hún hefði náð að afstýra mögulegri hryðjuverkaárás hér á landi. Þetta var meðal þess sem fram kom í spjalli Arnþrúðar Karlsdóttur útvarpsstjóra og Péturs Gunnlaugssonar í símatímanum í morgun þar sem þau fjölluðu um aðgerðir lögreglu og þá umræðu sem hefur staðið yfir um málið í fjölmiðlum.
Pétur byrjaði á því að rifja upp þegar Ástþór Magnússon hafði verið handtekinn fyrirvaralaust á veitingastað á sínum tíma fyrir að lýsa því yfir á bloggi sínu og blöðum að íslenskar flugvélar gætu orðið skotmörk vegna vopnaflutninga sem þær voru notaðar í. Ástþór var settur í gæsluvarðhald í nokkra daga þar til dómari úrskurðaði að Ástþór hefði ekki átt að vera í gæsluvarðhaldi og síðar þegar málið kom til kasta dómstóla var Ástþór laus allra mála.
„Ástþór hefur greint frá því að það var þrýstingur frá stjórnmálamönnum að hann skyldi handtekinn með þessum hætti, ég veit ekki hvort það hafi verið sannað en það er auðvitað mjög slæmt ef að stjórnmál og málefni lögreglunnar fara að renna saman og þú hefur einmitt greint frá því Arnþrúður en þetta er einmitt það sem er mikil hætta á að gerist“segir Pétur.
Arnþrúður segir athyglisvert að þó málið sé enn á þessu frumstigi og lítið hafi komið fram um bæði alvarleika málsins og hverjir hafi staðið á bak við það, þá sé fræðasamfélagið kallað til og það sé fengið til þess að fjalla um málið og tengja það við hægri öfgar án þess að hafa nokkrar upplýsingar um málið umfram það sem almenningur hefur.
„það er búið að vera tala við þetta svokallaða fræðasamfélag, það er búið að vera að ræða við Lögregluskólann á Akureyri og fólk úr tveimur deildum Háskóla Íslands og allir virkjaðir úr hinu svokallaða fræðasamfélagi og þá eiga þeir að fara að leggja mat á hvers eðlis málið er þrátt fyrir að vita ekkert meira um málið en almenningur og þetta er allt að gerast á nokkrum klukkutímum. Þarna virðist fræðasamfélagið tengja þetta við hægri öfgar en hvað veit þetta fólk sem er að kenna í háskólastofnunum um málið á þessum nokkru klukkutímum sem réttlætir að þeir lýsi svona yfir, þeir hafa tæpast forsendur til þess. Það er eins og verið sé að markaðssetja þetta orð á Íslandi, Hægri öfgamaður, það er það sem er verið að markaðssetja og skapa þannig ótta og hræðslu á meðal almennings. Til að skapa enn meiri hræðsluáhrif er þetta tengt við Andres Breivik sem framdi voðaverkin í Noregi fyrir all nokkru „segir Arnþrúður.
Arnþrúður segir að með slíkri markaðssetningu sé markmiðið að koma þessu orði inn í pólitíkina svo hægt sé að stimpla heilu hópana og stjórnmálamennina með því.
„þetta háskólasamfélag sem núna er búið að tala um þetta mál í hálfan sólarhring hefur engar forsendur til þess að vita neitt um innihald þessa máls nema lögreglan hafi rétt þeim það inn einhvers staðar bakdyramegin og ég ætla að leyfa mér að fullyrða að svo hafi ekki verið, þetta er því áróður sem háskólasamfélagið dreifir“segir Arnþrúður
Hlusta má á spjallið hér að neðan