Ákvörðun Grikklands að skilgreina Tyrkland sem öruggt þriðja land fyrir hælisleitendur frá Sýrlandi, Afghanistan, Pakistan, Bangladesh og Sómalíu þýðir róttæka breytingu í meðhöndlun hælisleitenda og búist er við að það muni minnka mjög möguleika bátaflóttamanna að sækja um hæli í Grikklandi.
Samkvæmt Greek City Times er ákvörðun Grikklands ein sú mikilvægasta í innflytjendalögum landsins í lengri tíma og var ákvörðunin tekin í kjölfar þess, að Grikkland telur ekki lengur, að hælisleitendur séu í hættu vegna kynþáttar, trúarbragða, þjóðerni eða stjórnmálaskoðana í Tyrklandi. Þeir hælisleitendur sem koma ólöglega til Grikklands gegnum Tyrkland munu því ekki lengur eiga rétt til að sækja um hæli í Grikklandi. Áður tók það allt upp í ár að afgreiða hælisumsóknir en eftir breytinguna er reiknað með að það taki bara 1-2 daga. Í dag er um 90% hælisumsókna frá innflytjendum frá ofangreindum fimm löndum.
Notis Mitarakis ráðherra innflytjendamála Grikklands segir, að ákvörðunin um að meta Tyrkland sem öruggt þriðja land sé mikilvægt skref í baráttunni gegn hinu ólöglega flæði innflytjenda og glæpastarfi mannsmyglara. Framar öllu er það skref til að framfylgja ESB-samningnum við Tyrkland um að landið megi ekki láta ólöglegan straum hælisleitenda halda áfram til Grikklands. Búist er við að draga muni verulega úr þrýsting hælisleitenda áfram til landa í Evrópu t.d. Svíþjóðar, Þýskalands og Frakklands.