Bætt þjónusta við sjúklinga með heilaskaða

Hópmeðferð fyrir fólk sem hlotið hefur heilaskaða verður efld á Reykjalundi með aukinni aðkomu sérhæfðra starfsmanna. Heilbrigðisráðherra hefur falið Sjúkratryggingum Íslands að ganga til samninga við Reykjalund um þessa þjónustu.

Sérfræðingar og samtök sjúklinga hafa um skeið bent heilbrigðisráðuneytinu á að heilbrigðisþjónustu og ýmsum stuðningi við fólk sem glímir við alvarlega heilaáverka og heilaskaða sé í ýmsu áfátt. Til að bregðast við þessum ábendingum fól ráðherra starfshópi að fara yfir stöðuna og leggja til úrbætur. Starfshópurinn skilaði ráðherra skýrslu með tillögum sínum í júní síðastliðnum og er þar meðal annars lagt til að efla hópmeðferð á Reykjalundi fyrir þá sjúklinga sem hér um ræðir.

Í tilkynningu segir að til ráðstöfunar í verkefnið sé föst fjárveiting sem nemui tuttugu milljónum króna á ári. Í samningnum verður kveðið á um eðli þjónustunnar, magn og gæði. Gert er ráð fyrir að samningurinn gildi til allt að fimm ára.

Athugasemdir

athugasemdir

Deila