Svandís Svavarsdóttir heilbrigðisráðherra hefur skipað nefnd sem hefur það hlutverk að fjalla um menntun hjúkrunarfræðinga og gera tillögur um aðgerðir sem leitt geta til þess að fleiri útskrifist með hjúkrunarfræðimenntun.
Á fundi ráðherranefndar um samræmingu mála 15. ágúst síðastliðinn kynnti heilbrigðisráðherra tillögur sínar um starfshópa til að fjalla um menntunarmál heilbrigðisstétta. Á fundinum voru einnig rædd áform um samstarf heilbrigðisráðuneytis og mennta- og menningarmálaráðuneytis á þessu sviði, meðal annars með stofnun starfshóps eins og hér um ræðir varðandi menntun hjúkrunarfræðinga. Fram kemur í tilkynningu að nefndinni sé ætlað að skila tillögum sínum fyrir 1.mars næstkomandi.
Formaður starfshópsins er Vilborg Ingólfsdóttir, skipuð af heilbrigðisráðherra. Aðrir nefndarmenn eru:
- Herdís Gunnarsdóttir, tilnefnd af mennta- og menningarmálaráðuneytinu
- Þórhalla Sigurðardóttir, tilnefnd af Sjúkrahúsinu á Akureyri
- Helga Gottfreðsdóttir, tilnefnd af Ljósmæðrafélagi Íslands
- Margrét Hrönn Svavarsdóttir, tilnefnd af Heilbrigðisvísindasviði Háskólans á Akureyri
- Herdís Sveinsdóttir, tilnefnd af Hjúkrunarfræðideild Heilbrigðisvísindasviðs Háskóla Íslands
- Hrund Scheving Thorsteinsson, tilnefnd af Landspítala
- Gísli Kort Kristófersson, tilnefndur af Félagi íslenskra hjúkrunarfræðinga
- Starfsmaður hópsins er Brynhildur Magnúsdóttir, sérfræðingur í heilbrigðisráðuneytinu.
