Það eru lyfjafyrirtækin sem stjórna bólusetningaráætlunum og það sýnir sig best í því að yfirvöld fari eftir því sem þau segja líkt og nú þegar Pfizer segist vera tilbúnir með bóluefni fyrir börnin og þá stökkvi stjórnvöld af stað og ætli að bólusetja börnin.
Þetta var meðal þess sem fram kom í spjallinu í símatímanum í dag en þar ræddu Arnþrúður Karlsdóttir útvarpsstjóri og Pétur Gunnlaugsson um fyrirhugaðar bólusetningar á börnum, hagsmuni lyfjarisanna og þá alvarlegu stöðu að Sóttvarnaráð hafi ekki verið kallað saman vegna Covid 19.
Arnþrúður benti á að allan þann tíma sem Covid hafi gengið yfir landið hafi sóttvarnalæknir aldrei kallað saman sóttvarnaráð, sem sé grafalvarlegt mál en þess í stað hafi verið kallaður til dómari ásamt litlum lokuðum hópi manna til þess að semja ný sóttvarnarlög, og þá sé nú staðan á Landspítalanum rædd eins og staðan sé Covid um að kenna þegar raunin sé sú að um sé að ræða áralanga vanrækslu af hálfu heilbrigðisráðherra og loforð um úrbætur hafi verið svikin.
Þá minnti Arnþrúður á að læknum hafi ofboðið svo sinnuleysi ráðherra að tæplega eitt þúsund læknar hafi í júní á þessu ári sent Svandísi heilbrigðisráðherra áskorun um að standa við gefin loforð um úrbætur, þessi loforð hafi ekki enn verið efnd og því sé staðan sem sé á sjúkrahúsinu nú ekkert sem hefði átt að koma stjórnvöldum á óvart.
Arnþrúður sagði það athyglisvert hvernig yfirvöld afneiti veikindum fólks vegna bólusetninga og hafi gerst svo ósvífin að láta það frá sér fara að um flökkusögur sé að ræða. Staðreyndin sé hins vegar sú að á annað þúsund konur hafi til dæmis stofnað hópa þar sem aukaverkanir sem þær hafa orðið varar við eru ræddar. Þá séu stjórnvöld nú að undirbúa bólusetningar á 12-15 ára börnum vitandi hvaða aukaverkanir hafi þegar komið fram hjá fullorðnum.
Hlusta má á spjallið hér að neðan.
