Mest er að marka þær skoðanakannanir sem framkvæmdar eru nokkrum dögum fyrir kosningar. Þetta var meðal þess sem fram kom í máli Ólafs Þ. Harðarsonar prófessors í stjórnmálafræði í síðdegisútvarpinu í dag en hann var gestur Arnþrúðar Karlsdóttur.
Í þættinum var farið ítarlega yfir aðferðarfræði mismunandi skoðanakannanna, hvernig úrtak í hinum ýmsu könnunum er valið og hvað það er sem hefur áhrif á niðurstöður þeirra. Ólafur benti að mjög margt gæti spilað inn í þegar gerðar séu kannanir og nefndi dæmi um símakönnun sem gerð var þegar símar voru ekki orðnir mjög útbreiddir
“ þá var það þannig að það voru helst þeir efnameiri sem áttu síma og því var þýðið í þeirri könnun að meirihluta efnameira fólk, sem varð þess valdandi að það skekkti niðurstöður könnunarinnar„.
Þá sagði Ólafur að algengt væri að aldurssamsetning þeirra sem þátt taki í könnunum skipti einnig máli því ungt fólk hafi oft aðrar skoðanir en þeir sem eldri eru og því geti niðurstaða einnig litast af því hver aldurssamsetning þýðisins sé.
Hlusta má á viðtalið í spilaranum hér að neðan.