Kínverjar munu fá lykilaðstöðu í njósnum og hermálum í 5 þúsund kílómetra radíus frá hafnarborginni Chabahar í suðaustur Íran samkvæmt samningi Kína við Íran til 25 ára. Mun kínverski kommúnistaflokkurinn byggja upp risanjósnakerfi og hafa eftirlit þar með Írönum eins og gert er við Kínverja samkvæmt upplýsingum frá heimildarmönnum írönsku ríkisstjórnarinnar við OilPrice.com í síðustu viku.
Íran er orðinn óaðskiljanlegur hluti af heimsyfirráðastefnu kínverskra kommúnista í verkefninu „Belti og Braut“. Kínverskir kommúnistar munu byggja upp yfirburða hernaðaraðstöðu í Miðausturlöndum með njósnasvæði sem spannar yfir gríðarleg landsvæði allt frá Evrópu í vestri til Kína í austri, Kazakhstan í norðri og Eþíópíu í suðri. Innan njósnasvæðisins liggja m.a. Indland, Pakistan, Saudi Arabía, Egyptaland, Tyrkland, Grikkland og hluti af Ítalíu, þannig að ljóst er að ef Kína nær að byggja upp þessa aðstöðu mun það kollvarpa núverandi hernaðarstöðu í heiminum. Samtímis fær Kína aðgang að ungu, menntuðu vinnuafli sem er tiltölulega ódýrt fyrir kínverskan iðnað. Hafist verður handa við að byggja upp njósnakerfið gegn írönskum ríkisborgurum eins fljótt og auðið er eftir fund Byltingarráðs og leyniþjónustu Írans með Kínverjum í lok október.
15 milljónir eftirlitsmyndavélar til að njósna um íbúa Íran tengdar Kína
Byrjað verður á að staðsetja um 10 milljónir eftirlitsmyndavélar í stærstu borgum Írans og 5 milljónir til viðbótar í 21 borgum og verða allar vélarnar tengdar beint við gríðarlega eftirlitsmiðstöð kínverska ríkisins.
„Þetta mun skapa fullkomna upptöku Írans á næstu kynslóð kínverska eftirlitskerfisins þar sem hægt verður að sameina allar sýnilegar upplýsingar um hegðun einstaklinga við staðbundnar, þjóðlegar og svæðisbundnar upplýsingar skráðar í tölvum“ segir heimildarmaður íranskra yfirvalda.
„Á sama tíma mun Kína hefja tilraunir í Íran með eigið ritskoðað Internet á bak við stórkostlegan varnarvegg Kína (sem lokar á erlenda netmiðla) og hefja kennslu í Mandarín sem aðal erlendu máli í skólum Írans – í byrjun jafnhliða ensku en síðar í stað enskunnar. Eftir þetta ferli munu sjö stórborgir í Íran vera á meðal 25 borga í heiminum þar sem íbúarnir eru undir mestu eftirliti.“
Kína mun einnig byggja risaverksmiðjur að kínverskri fyrirmynd í Íran og skapa framleiðslu með ódýru vinnuafli eins og t.d. Apple gerir í Kína. „Það verður eins og risahönd flytji verksmiðju frá miðhluta Kína og staðsetji í Íran á sama hátt og Apple vinnur í Kína og kínversk fyrirtæki vinna í mismunandi löndum í Afríku.“ Vörurnar verða síðan fluttar til Vesturlanda á nýjum flutningaleiðum sem kínversk fyrirtæki munu byggja í Íran m.a. með rafvæðingu 900 km járnbrautaleiðar á milli Theran og Mashhad. Einnig á að byggja hraðlest á milli Teheran og Qom og Isfahan.
Íran verður hluti varnarsvæðis Kína
Í samkomulaginu felst að Kína mun vera með hernaðarlega nærveru í Íran skv. sameiginlegri varnarmálastefnu Kína og Íran. Fyrsta verkefnið verður að tryggja að starfsfólk og hergögn sem Kínverjar og Rússar hafa í Íran geti varist árásum. Hið sama gildir um gas- og olíuframleiðslu sem bæði kínversk og rússnesk fyrirtæki vinna að undir merkjum frjálsra samninga, þrátt fyrir viðskiptaþvinganir Bandaríkjanna gegn Íran. Kínverjar munu einnig bæta við hernaðartækni við eldflaugavarnarkerfi Rússa sem komið hefur verið fyrir á mörgum stöðum í Íran og hefjast slíkar framkvæmdir fljótlega við flugvellina í Hamedan, Bandar Abbas, Chabahar og Abadan.
Bæði rússnesk og kínversk herskip hafa aðstöðu í lykilhöfnum eins og Chapahar, Bandar-e-Bushehr og Bandar Abbas. Kínverjar munu senda þúsundir „öryggisstarfsmanna“ til að tryggja kínversk verkefni en margir starfsmannanna eru flughermenn, liðsforingjar á herskipum og kafbátum m.m. „Talan mun hækka upp í 50 þúsund starfsmenn á næstu 14 mánuðum og mun helmingurinn vinna að olíu- og gasverkefnum og tengdum hagsmunum Kína í Íran.“
Kínverski kommúnistaflokkurinn mun hefja byggingu stærstu hlerunarstöðvar í heiminum í Chabahar í nóvember: „Um þúsund manns eiga að starfa við stöðina, m.a. hátt settir kínverskir leyniþjónustu- og samskiptamenn ásamt Rússum sem aðstoða við tæknirekstur ásamt nokkrum handvöldum Írönum. Stöðin getur hlerað fjarskipti í næstum 5 þúsund kílómetra radíus.“
Njósnastöðin mun gera Kínverjum kleift að njósna um hernaðarkerfi NATO og stuðningsríkja NATO og vinveitt ríki Bandaríkjanna eins og Sádí Arabíu, Sameinuðu arabísku furstadæmunum og Ísrael.