Krefja heilbrigðisráðherra um skýrslu vegna flutninga skimunar

Svandís Svavarsdóttir heilbrigðisráðherra.

Þorbjörg S. Gunnlaugsdóttir þingkona Viðreisnar hefur lagt fram beiðni um að Svandís Svavarsdóttir heilbrigðisráðherra láti óháðan aðila vinna skýrslu fyrir Alþingi um forsendur og áhrif breytinga á skipulagi skimunar fyrir krabbameini í leghálsi. Að baki beiðninni standa fjórir flokkar Viðreisn, Samfylkingin, Miðflokkurinn og Píratar.

Tilefni beiðninar er ákvörðun ráðherra um flutningana sem óhætt er að segja að hafa vakið upp deilur. Í tilkynningu vegna framlagningar beiðninnar segir meðal annars

Skimun varðar heilsu og líf kvenna og mikilvægt er að traust ríki í garð heilbrigðiskerfisins og sátt sé um fyrirkomulag heilbrigðisþjónustu. Markmiðið með skýrslubeiðni er að stuðla að því unnt verði að efla traust kvenna og alls almennings til kerfisins. Rýna þarf forsendur að baki þeirri ákvörðun heilbrigðisráðherra að semja við erlenda rannsóknarstofu  um að sinna greiningum á sýnum sem og samráð heilbrigðisráðuneytis áður en ákveðið var að flytja vinnunna til Danmerkur. Í skýrslunni skuli könnuð áhrif flutningsins á kostnað við greiningu sýna, áhrif breytinganna á öryggi skimunar, m.a. vegna aðgengis, flutninga og samskipta milli landa og áhrif á sérhæfð störf við greiningar hérlendis sem og  áhrif á aðra rannsóknar- og greiningarvinnu hérlendis. Einnig skal kannað hvort heilbrigðisráðuneytið hafi lagt mat á greiningargetu meinafræðideildar Landspítalans og áhrif flutnings á aðgengi að sýnum fyrir íslenska sérfræðinga heilbrigðiskerfisins. “

Þá er einnig bent á að Læknafélag Íslands hafi ályktað að með því að flytja úr landi rannsóknarhluta krabbameinsleitar í leghálsi séu mikilvæg sérhæfð störf lögð niður og flutt úr landi. Undir þetta hafa Skimunarráð, landlæknir, Félag íslenskra fæðinga- og kvensjúkdómalækna, Félag íslenskra rannsóknarlækna og meirihluti fagráðs um skimun fyrir leghálskrabbameini tekið.

Athugasemdir

athugasemdir

Deila