Sænska útvarpið SR Ekot greinir frá því að Evrópuþingið muni greiða atkvæði í næstu viku að lýsa yfir neyðarástandi í loftslags- og umhverfismálum.
Héruð og borgir í meira en 20 löndum hafa áður lýst yfir „loftslagsneyðarástandi“ til að stöðva svo kallaðar loftslagsbreytingar. Núna gæti ESB lýst yfir slíku ástandi í öllum ríkjum Evrópusambandsins. Atkvæðisgreiðsla fer fram á Evrópuþinginu í næstu viku.
Tillagan verður lögð fram áður en loftslagsráðstefna Sameinuðu þjóðanna COP 25 fer fram í Madríd 2. – 13. desember n.k. og áður en nýja framkvæmdastjórn ESB tekur við en hún hefur lofað að taka „loftslagsmálin“ mjög alvarlega.
Margir flokkshópar á þinginu eru sagðir styðja hugmynd um „loftslagsneyðarástand“ m.a. hópurinn Renew Europe. Sænski Miðflokkurinn og Sósíaldemókratar standa að baki hugmyndinni.
Jytte Guteland Evrópuþingmaður sænskra Sósíaldemókrata segir í viðtali við sænska útvarpið
„þetta er hugsað eins og vekjaraklukka, svo það þýðir að allt stjórnmálakerfið verður sett í viðbragðsstöðu. Að allar ákvarðanir verða teknar út frá loftslagsvánni, við þurfum að fá loftslagspólitík sem er æðri öllum öðrum stjórnmálum. Allt kerfið verður að fara í þessa einu átt. Það er afstaða mín með því að hafa frumkvæði með að lýsa yfir loftslagsneyðarástandi“ segir Jytte.
