Um tvö þúsund manns söfnuðust í Stokkhólmi í dag 1. maí til að mótmæla lokunum og skerðingu frelsis vegna kórónuveirunnar. Lögreglan hafði auglýst fyrirfram að harðhönskum yrði beitt fylgdu mótmælendur ekki takmörkunum um samkomur en hæst mega 8 manns safnast saman í framlengdum skerðingum yfirvalda vegna þriðju sýkingarbylgjunnar sem tekið hefur hart á Svíum. Var safnast saman við Norra Bantorget og gengið niður Vasagatan í miðborg Stokkhólmsborgar og kölluðu mótmælendur „Frelsi fyrir Svíþjóð.“
Lögreglan greip fljótt inn í leikinn og stöðvaði gönguna. Stillti lögreglan bílum sínum á einum gatnamótum til að stöðva mótmælendur. Peter Ågren yfirmaður lögreglunnar sagði við SVT, að í það stóra heila hefði allt farið friðsamlega fram en allir vildu þó ekki hlýða lögreglunni: „Við fjarlægðum og rákum þó nokkra burtu og þá gerðu tveir einstaklingar harða mótstöðu.“ Að sögn Samnytt sem var á staðnum voru um 30 manns fjarlægðir af lögreglu.
Maria Rotzén Östlund smitsjúkdómalæknir í Stokkhólmi gagnrýndi mótmælendur og segir að „burtséð frá tilefni mótmælanna, þá er það ósættanlegt að svo margir safnist saman á meðvitaðan hátt eins og í dag. Miðað við það alvarlega ástand sem ríkir er betra að nota aðrar aðferðir til að tjá skoðanir sínar.“
