Múhameðsskopteiknarinn Kurt Westergaard er dáinn

Hinn þekkti danski listamaður Kurt Westergaard er látinn 86 ára að aldri. Westergaard varð víða þekktu, þegar mynd hans af Múhameð spámanni múslima var birt í Jyllands-Posten árið 2005.

Berlingske skrifar í minningargrein um listamanninn, að Kurt Westergaard hafi orðið tákn tjáningarfrelsis í Danmörku í starfi sínu sem skopmyndateiknari hjá Jyllands-Posten. Ekstra Bladet rifjar upp, að skopmynd hans af Múhameð spámanni hafi orsakað eina stærstu utanríkismálakreppu í sögu Danmerkur.
Westergaard hefur sjálfur lýst sér sem „menningarlega róttækum hálfhippa sem hvetur til friðar, rýmis fyrir alla og góðrar sambúðar.“

Auk þess að skapa kreppu í utanríkismálum, þá gerði teikning Westergaards hann að hatursefni múslima um allan heim. Samkvæmt upplýsingum var verð upp á nokkrar milljónir króna sett honum til höfuðs skrifar blaðið. Hann neyddist fljótlega til að lifa undir stöðugri vernd dönsku öryggis- og leyniþjónustunnar PET.

Ráðist á heimilið

Þann 1. janúar 2010 braust maður af sómölskum ættum inn á heimili Westergaard og réðst á hann með exi og hníf. Westergaard slapp með því að læsa sig inni í baðherberginu, sem yfirvöld höfðu látið breyta í öryggisherbergi.

Lögregla var fljótt á staðnum og skaut árásarmanninn í annan fótinn og handlegginn, þar sem hann réðst einnig lögregluna með vopnum. Maðurinn var dæmdur í tíu ára fangelsi og síðan vísað úr Danmörku til æviloka. Í kjölfar morðtilræðisins fékk Westergaard enn meiri gæslu.
Nokkrum árum síðar var 29 ára maður einnig handtekinn eftir að hafa hótað að sprengja Westergaard.

Westergaard fæddist í Døstrup á Norður-Jótlandi. Áður en hann byrjaði sem teiknari hjá Jyllands-Posten árið 1983 starfaði hann í nokkur ár sem kennari í þýsku og skólaeftirlitsmaður. Westergaard starfaði sem teiknari hjá Jyllands-Posten þar til hann fór á eftirlaun árið 2010.

„Ég vil að mín verði minnst sem manns sem barðist fyrir málfrelsi. En enginn vafi leikur á því, að einhver mun í staðinn muna eftir mér sem sjálfum djöflinum, sem móðgaði trúarbrögð milljarðs manna. “
Kurt Westergaard

Westergaard lést eftir langvarandi veikindi. Hann lætur eftir sig eiginkonu, fimm börn, tíu barnabörn og eitt barnabarnabarn.

Athugasemdir

athugasemdir

Deila