Þann 30. september var haldin athöfn í Kreml vegna inngöngu Donetsk, Lugansk, Zaporozhye og Kherson í Rússland. Vladimír Pútín hélt ræðu sem ýmsir telja tímamótaræðu en vestrænir fjölmiðlar forðast að segja rétt frá og endurtúlka í staðinn innihaldið í eitthvað ljótt og neikvætt. Útvarp Saga birtir hluta úr ræðunni í í lausri þýðingu en ræðuna í heild má lesa á ensku neðar á síðunni og einnig hlusta á í enskri þýðingu á myndbandi þar fyrir neðan. Ræðan ber sterkan hugsjónakeim og er ekki eingöngu beint að Rússum heldur öllum heiminum, sem glóbalistarnir eru að leggja undir sér.
Vísaði til rétt fólks og þjóða að ákveða eigin mál sjálf
Vladimir Pútín byrjaði á því að verja rétt fólksins á úkraínsku svæðunum til að sjálf ákveða örlög sín og vísaði til sáttmála Sameinuðu þjóðanna:
„Það er tvímælalaust réttur þeirra, eðlislægur réttur innsiglaður í 1. grein sáttmála Sameinuðu þjóðanna, sem kveður beint á um meginregluna um jafnan rétt og sjálfsákvörðunarrétt þjóða.“
Vestrænir fjölmiðlar hafa kosið að ógilda þjóðaratkvæðagreiðslurnar og halda því fram, að rússneskir hermenn hafi neytt Úkraínumenn til að játast Rússlandi undir vopnahótun. Rússneska forystan svarar því til, að þetta séu falsupplýsingar og að rússnesku hermennirnir verndi borgarana, sem kusu enda eru allir íbúarnir undir stöðugri ógn og skotárásum úkraínska hersins m.a. nasistaherdeildinni Azov og málaliðum frá Vesturlöndum.
Íbúar svæðanna og alþýðulýðveldanna hafa sagt sitt, segir Pútín. Um 90% atkvæða samþykktu að verða hluti af móðurlandinu Rússlandi. Föstudaginn 30. september 2022 var innlimun og upptaka svæðanna staðfest við hátíðlega athöfn í Moskvu.
Pútín þakkaði hetjulegar tilraunir Rússa gegn stríðsglæpum og mannréttindabrotum úkraínsku stjórnarinnar:
„Við munum alltaf minnast hetja vorra í rússneska vorinu, þeirra sem neituðu að samþykkja valdarán nýnasista í Úkraínu árið 2014, allra þeirra sem dóu fyrir réttinn að fá að tala móðurmálið, að fá að varðveita menningu sína, hefðir og trú og fyrir sjálfan réttinn að lifa. Við minnumst hermanna Donbass, píslarvotta „Odessa Khatyn“ fórnarlamba ómannúðlegra hryðjuverkaárása. sem Kænugarðsstjórnin framdi.“
Ekkert sterkara en að snúa aftur til síns sanna föðurlands
Pútín ræddi rússneska, sögulega og andlega arfleifð, sem Rússar nútímans halda uppi með stolti. Hann sagðist sakna blómaskeiðs Sovétríkjanna, sem svarað er með hneyksluðum ummælum stjórnmálaskýrenda á Vesturlöndum. Pútín benti á, að Rússar þurfi ekki lengur á Sovétríkjunum að halda, því það sem sameinar Rússa í dag sé sameiginlegur menningararfur og önnur gildi en ríkja á Vesturlöndum, sem hann víkur nánar að í síðari hluta ræðunnar.
„Á bak við val milljóna íbúa Donetsk og Lugansk alþýðulýðveldanna, í Zaporozhye og Kherson héruðum, liggja sameiginleg örlög okkar og þúsund ára saga. Fólk hefur miðlað þessum andlega arfi til barna sinna og barnabarna. Þrátt fyrir allar raunirnar, sem þau máttu þola, þá báru þau ást sína á Rússlandi í gegnum árin. Þetta getur enginn eyðilagt. Þess vegna hafa bæði eldri kynslóðir og ungt fólk – þau sem fædd eru eftir sorglegt hrun Sovétríkjanna – kosið um einingu okkar, fyrir sameiginlegri framtíð okkar.“
„Í dag eru engin Sovétríki til lengur; við getum ekki snúið aftur til fortíðarinnar. Reyndar þarf Rússland ekki á því lengur að halda í dag. Það [að endurvekja Sovétríkin] er ekki metnaðarmál okkar en það er ekkert sterkara en ákvörðun milljóna manna, sem í gegnum menningu sína, trú, hefðir og tungumál, telja sig vera hluti af Rússlandi en forfeður þeirra bjuggu í aldaraðir í einu landi. Það er ekkert sterkara til en staðráðin ákvörðun þeirra að snúa aftur til síns sanna sögulega föðurlands.“
Skorum á yfirvöld í Kænugarði að setjast við samningaborðið – við viljum það
Pútín fjallaði um valdaránið á Úkraínu og Kænugarði árið 2014 og hvað verður að taka við í dag: friður, uppbygging og koma málum aftur í eðlilegt horf:
„Í átta löng ár þurfti fólkið í Donbass að þola þjóðarmorð, sprengjuárásir og hindranir. Í Kherson og Zaporozhye var glæpastefnu framfylgt, sem ræktaði hatur á Rússlandi, á öllu rússnesku. Jafnvel núna meðan á þjóðaratkvæðagreiðslunum stóð, þá hótaði stjórn Kænugarðs að hefna sín á og drepa skólakennara og konur sem störfuðu í kjörstjórnum. Kænugarður hótaði milljónum manns, sem tjáðu hug sinn gegn kúgun. En ekki tókst að brjóta niður íbúar Donbass, Zaporozhye og Kherson og þeir tjáðu vilja sinn.“
„Ég vil að yfirvöld í Kænugarði og raunverulegir stjórnendur þeirra á Vesturlöndum hlusti á mig núna og ég vil að allir muni þetta: fólkið sem býr í Lugansk og Donetsk, í Kherson og Zaporozhye eru orðnir rússneskir meðborgarar – að eilífu.“
„Við skorum á Kænugarðsstjórnina að hætta tafarlaust hernaðarárásum og öllum ófriði og binda enda á stríðið sem þeir hófu aftur árið 2014 og snúa aftur að samningaborðinu. Við erum tilbúin til þess eins og við höfum sagt oftar en einu sinni en við breytum ekki útkomu kosninganna í Donetsk, Lugansk, Zaporozhye og Kherson. Ákvörðun hefur verið tekin og Rússar munu standa við hana. Núverandi yfirvöld í Kænugarði ættu að virða þessa frjálsu tjáningu á vilja fólksins, það er engin önnur leið. Þetta er eina leiðin til friðar.“
Munum endurbyggja allt sem hefur verið eyðilagt
„Við munum verja landið okkar með öllum þeim kröftum og auðlindum sem við höfum og við munum gera allt, sem við getum til að tryggja öryggi fólksins okkar. Þetta er hið mikla frelsisverkefni þjóðar vorrar.“
„Við munum svo sannarlega endurbyggja eyðilagðar borgir, íbúðarhús, skóla, sjúkrahús, leikhús og söfn. Við munum endurreisa og þróa iðnaðarfyrirtæki, verksmiðjur, innviði og almannatrygginga-, lífeyris-, heilbrigðis- og menntakerfi.“
„Við munum vissulega vinna að því að bæta öryggismálin. Saman munum við tryggja, að borgarar nýju svæðanna geti fundið fyrir stuðningi allra íbúa Rússlands, allrar þjóðarinnar, allra lýðvelda, héraða og svæða í okkar mikla móðurlandi.“
Um helgina tilkynntu Rússar að rússneskir hermenn hefðu neyðst til að hörfa frá bænum Lyman, sem var umkringdur úkraínskum hermönnum með stuðningi Vesturlanda. Vestrænir fjölmiðlar brugðust hrósandi við Pútín og sögðu að Lyman væri „frelsað.“