Reykjavíkurflugvöllur mun verða áfram í Vatnsmýrinni ef ekki finnst jafn gott eða betra svæði fyrir flugvöll. Þetta kom fram í máli Sigurðar Inga Jóhannssonar samgöngu og sveitarstjórnaráðherra í síðdegisútvarpinu í dag en hann var viðmælandi Arnþrúðar Karlsdóttur.
Sigurður segir að verið sé að meta aðra kosti og sagði rannsóknir standa yfir í Hvassahrauni, hvort svæðið henti undir flugvöll en flugmenn hafa ítrekað bent á að þeir telji svæðið ekki hentugt fyrir flugvöll
“ við erum í vegferð og erum með það til skoðunar hvort Hvassahraun sé ákjósanlegt svæði en það er nú svo að á meðan ekki finnst jafn gott eða betra svæði en það sem Reykjavíkurflugvöllur stendur á núna þá verður flugvöllurinn þar áfram“,segir Sigurður.
Hann segir þær rannsóknir sem standi yfir á svæðinu við Hvassahraun taka á mörgum þáttum sem þurfi að hafa í huga
“ það er verið að skoða veður, flugmöguleika en það er líka verið að skoða aðra þætti eins og vatnsvernd, jarðfræði og aðra slíka þætti samhliða, að þeim rannsóknum loknum kemur niðurstaða um hvort Hvassahraun sé ákjósanlegur staður og ef svo er þá munum við halda áfram með þá vinnu, en að minnsta kosti verður Reykjavíkurflugvöllur þar sem hann er næstu fimmtán til tuttugu árin“,segir Sigurður.
Hlusta má á þáttinn í spilaranum hér að neðan.
