Samráðsleysi, uppgjöf og uppsagnir er það sem einna helst einkennir þá ríkisstjórn sem nú er við völd. Þetta kom fram í máli Ágústs Ólafs Ágústssonar þingmanns Samfylkingarinnar og Þorsteins Sæmundssonar þingmanns Miðflokksins í síðdegisútvarpinu í dag en óhætt er að segja að þeir félagar séu afar ósáttir við störf ríkisstjórnarinnar. Ágúst Ólafur segir ríkisstjórnina í raun orðna pólitískt gjaldþrota
“ það má nefna að 75% þeirra aðgerða sem ríkisstjórnin hefur farið í er að setja fólk á atvinnuleysisbætur í stað þess að koma efnahagslífinu af stað, hvar er eiginlega metnaðurinn, hvar er viðspyrnan?, af hverju er ekki talað við hina flokkana á þingi og þeir hafðir með í ráðum“ spyr Ágúst.
Þorsteinn segir að helsta einkenni ríkisstjórnarinnar í þeim aðgerðum sem farið hefur verið í sé samráðsleysi
„ það er ekki talað við nokkurn mann og ekkert reynt að hafa samráð við neinn, það er bara allt í einu boðað til blaðamannafunda og þar fyrst fá hinir flokkarnir að vita um aðgerðir sem á að fara í, svo gerist það að menn fá nóg af samráðsleysinu og benda á það í fjölmiðlum og þá verður allt vitlaust„,segir Þorsteinn.
Hlusta má á þáttinn í spilaranum hér að neðan
