Guðlaugur Þór Þórðarson utanríkisráðherra fagnar niðurstöðu skoðanakönnunar sem framkvæmd var af Grænlandsháskóla og sýnir mikinn áhuga Grænlendinga á aukinni samvinnu landanna. Þetta kom fram í ræðu ráðherra á rafrænum fundi Hringborðs norðurslóða – Arctic Circle í dag.
Efnt var til fundarins í tilefni af útgáfu skýrslu Grænlandsnefndar utanríkis- og þróunarsamvinnuráðherra í janúar síðastliðnum.
Í erindi sínu ræddi Guðlaugur Þór sem fyrr segir um nýja skoðanakönnun sem var gerð af Grænlandsháskóla, Ilisimatusarfik, í samstarfi við HS Analyse í Nuuk og Norðurlandadeild Konrad-Adenauer Stiftung í Stokkhólmi.
Könnunin er sú fyrsta sem mælir viðhorf Grænlendinga til utanríkismála og í henni birtist mikill stuðningur þeirra við aukið samstarf við Ísland, ekki síst í samanburði við aðrar þjóðir.
„Ég er sannfærður um að áhuginn er síst minni hér á Íslandi,“ sagði Guðlaugur. Hann lagði einnig áherslu á sameiginlega hagsmuni þjóðanna og mikilvægi náinnar samvinnu Grænlands og Íslands, sér í lagi á tímum loftslagsbreytinga þar sem sérstaða Grænlands er mikil.
„Það eru spennandi tímar framundan í tvíhliða samskiptum Íslands og Grænlands og víðtækir möguleikar til samstarfs sem mun styrkja báðar þjóðir,“ sagði Guðlaugur Þór.
Össur Skarphéðinsson, formaður Grænlandsnefndarinnar, flutti einnig erindi og svaraði spurningum.