Íslensk stjórnvöld hafa komið formlega á framfæri við rússnesk stjórnvöld hörðum mótmælum við ólöglegri innlimun héraða í Úkraínu og marklausum atkvæðagreiðslna sem þar voru haldnar. Sendiherra Rússlands í Reykjavík var kallaður til fundar í utanríkisráðuneytinu af þessu tilefni.
Martin Eyjólfsson, ráðuneytisstjóri í utanríkisráðuneytinu, boðaði Mikhaíl Noskov, sendiherra Rússlands, á fund þar sem hann áréttaði fordæmingu Íslands á tilraunum Rússlands til að innlima úkraínskt landssvæði. Um ólöglegan gjörning væri að ræða sem Ísland viðurkenndi ekki undir neinum kringumstæðum. Þá brytu atkvæðagreiðslur sem haldnar voru í fjórum héruðum í austurhluta Úkraínu algerlega í bága við alþjóðalög. Þessi framganga, auk óábyrgra hótana um beitingu kjarnavopna, væru alvarlegasta stigmögnun átakanna frá því að Rússar réðust inn í Úkraínu 24. febrúar sl. Vladimír Pútín Rússlandsforseti bæri alla ábyrgð á þessu grimmilega árásarstríði og það væri undir honum komið að binda á það enda.
Þetta er í fimmta sinn á undanförnum mánuðum sem rússneski sendiherrann er boðaður til fundar í utanríkisráðuneytinu þar sem honum hefur verið gerð grein fyrir afstöðu Íslands og kynntar ráðstafanir sem íslensk stjórnvöld hafa gripið til vegna framgöngu Rússlands gegn úkraínsku þjóðinni.
