Mennta- og barnamálaráðuneytið mun leggja fé til stuðnings sveitarfélaga þar sem börn á flótta frá Úkraínu og fjölskyldur þeirra eru með búsetu. Fram kemur í tilkynningu að markmiðið sé að brúa bilið fram að hausti með tímabundnum stuðningi við móttöku barnanna og skólastarf til að stuðla að virkri þátttöku þeirra.
Stutt er við fjölbreytt náms- og félagsleg úrræði sem mæta þörfum ólíkra aldurshópa barna og ungmenna 18 ára og yngri, s.s.:
- frístundastarf,
- íþrótta- og æskulýðsstarf,
- sumarskóla,
- vinnuskóla,
- námskeið í íslensku og íslenskri menningu,
- lífsleikninámskeið og -verkefni,
- samfélagsfræðslu,
- virkni yngstu barnanna.
Í tilkynningunni segir að sveitarfélög geti sótt um fjárhagslegan stuðning sem nemur allt að 200.000 kr. á hvert barn á aldrinum 0-18 ára. Þá segir að nánari upplýsingar um stuðninginn og umsóknarferlið verða sendar sveitarfélögum á næstu vikum.
Þá mun Mennta- og barnamálaráðuneytið einnig veita sveitarfélögum stuðning með ráðgjöf og námskeiðum um móttöku barna á flótta. Ráðgjöf og námskeið verða skipulögð í samstarfi ráðuneytisins og Menntamálastofnunar við sérfræðinga háskóla og sveitarfélaga í móttöku barna á flótta.