Þrír fulltrúar ríkisstjórnarflokkanna vinna tillögur að breytingum um Ríkisútvarpið

Lilja Alfreðsdóttir, mennta- og menningarmálaráðherra, hefur falið þremur fulltrúum ríkisstjórnarflokkanna að rýna lög um Ríkisútvarpið ohf. og gera tillögur að breytingum sem líklegar eru til að sætta ólík sjónarmið um starfsemi og hlutverk Ríkisútvarpsins.  Þetta kemur fram í tilkynningu frá Mennta og menningarmálaráðuneytinu.

Í tilkynningunni kemur fram að mikil umræða hafi verið í samfélaginu að undanförnu um stöðu Ríkisútvarpsins , umsvif þess á auglýsingamarkaði og neikvæð áhrif þeirra umsvifa á einkarekna fjölmiðla, en meðal annars hafa komið fram þau sjónarmið að umsvif Ríkisútvarpsins á fjölmiðlamarkaði valdi samkeppnisskekkju sem eigi sinn þátt í bágri rekstrarstöðu einkarekinna miðla  hér á landi.

Fulltrúarnir munu meðal annars skoða eftirfarandi atriði:

  • Rýna núverandi skilgreiningu á hlutverki RÚV og meta hvort þörf sé á endurskilgreiningu í ljósi breyttra samfélagsaðstæðna, tækniþróunar og vilja stjórnvalda til að varðveita og þróa íslenskt mál.
  • Leggja mat á hvernig Ríkisútvarpið geti sem best náð markmiði laga um stuðla að lýðræðislegri umræðu, menningarlegri fjölbreytni og félagslegri samheldni í íslensku samfélagi.
  • Meta hvernig Ríkisútvarpið sinni best öryggishlutverki sínu, með upplýsingamiðlun um útvarp, öðrum boðleiðum og/eða samstarfi við aðra fjölmiðla.
  • Rýna gildandi kröfur og reglur um dreifikerfi Ríkisútvarpsins og hvort þörf sé á frekari uppbyggingu kerfisins eða grundvallarbreytingum á skipulagi dreifikerfismála.
  • Meta hvernig fjármögnun RÚV sé best komið, hvort núverandi fyrirkomulagi skuli haldið óbreyttu til framtíðar eða hvort breytinga sé þörf.

Þeir fulltrúar flokkanna sem falið hefur verið þetta verkefni eru:

Kolbeinn Óttarsson Proppé, fulltrúi Vinstri hreyfingarinnar græns framboðs – formaður hópsins

Silja Dögg Gunnarsdóttir, fulltrúi Framsóknarflokksins

Páll Magnússon, fulltrúi Sjálfstæðisflokksins

Fram kemur að fulltrúarnir muni hafa til hliðsjónar þær athuganir og skýrslur sem gerðar hafa verið á síðustu árum um stöðu RÚV og fjölmiðla og kanna hvaða sambærileg vinna hefur farið fram vegna annarra almannaþjónustumiðla í Evrópu.

Athugasemdir

athugasemdir

Deila