Á meðan stjórnvöld halda leyndarhjúp utan um þá bóluefnasamninga sem gerðir hafa verið mun fólk vera tortryggið gagnvart þeirri leynd og eina leiðin til þess að draga úr þeirri tortryggni er að opinbera samningana. Þetta var meðal þess sem fram kom í máli Björns Þorra Viktorssonar lögmanns í síðdegisútvarpinu í dag en hann var gestur Arnþrúðar Karlsdóttur.
Björn veltir því fyrir sér hvað það sé sem ekki þolir dagsins ljós, hvort þarna leynist upplýsingar um tilraun sem verið sé að gera á almenningi án þess að leyfi hafi verið fengið fyrir slíkum rannsóknum.
Hann bendir á máli sínu til stuðnings að þegar liggi fyrir að viðræður hefðu farið fram við Pfizer um að gera tilraun með að bólusetja alla íslendinga með því bóluefni.
Hann segir leyndina ekki þó vera það eina sérkennilega í málinu heldur einnig sá hringlandaháttur og misvísandi upplýsingar sem almenningur fær, nú standi til dæmis efni til þess að bólusetja fólk aftur sem hafði fengið Covid þrátt fyrir bólusetningu.
Svo segir Björn að hann sé hugsi yfir því hvað yfirvöldum víða liggi mjög svo á að koma bóluefni í sem flesta á sem skemmstum tíma:
„Auðvitað mun fólk velta því fyrir sér hvort það séu einhver ákvæði í samningnum sem krefjist þess að bólusett svona hratt, fólk mun velta því fyrir sér á meðan samningurinn er ekki opinberaður“ segir Björn.
Hlusta má á viðtalið í spilaranum hér að neðan
