New York Post greinir frá misbresti í frásögn fjölmiðla af mótmælum að undanförnu sem eiga það sameiginlegt að reyna að koma höggi á Bandaríkjaforseta Donald Trump. Segir blaðið að Demókratar og ýmsir fjölmiðlar „verði að finna eitthvað – rétt eða rangt – sem nota megi gegn forsetanum, jafnvel þótt það þýði hreinlega að skálda eitthvað upp”.
Hér eru nokkur dæmi:
Rafmagnið sagt hafa verið tekið af Hvíta húsinu og Trump falið sig í neðanjarðarbyrgi
T.d. hafa ekki-forsetinn Hillary Clinton og fv. ráðgjafi Obama dreift myndum af Hvíta húsinu, einni upplýstu með ljósum í tíð Obama og annarri með slökktum ljósum í myrkri sem tákn um vanhæfa stjórn Donald Trumps. Gefið er í skyn að Trump sé ekki sjáanlegur og er mjög í sama anda og áróður kommúnistaflokks Kína sem kallar Trump „The bunker boy”. Slúðursögum var komið af stað um að Hvíta húsið væri rafmagnslaust og Trump hefði falið sig í neðanjarðarbyrgi Hvíta hússins þar til fréttamaður CNN benti á að ljós Hvíta hússins væru venjulega slökkt kl. 23.00 á kvöldin.
Ekki sagt frá fyrirskipun forsetans til dómsmálaráðuneytisins að hefja tafarlaust rannsókn á dauða George Floyd
Þegar föstudaginn 29 maí talaði Trump við fjölskyldu Floyds og fyrirskipaði dómsmálaráðuneytinu að rannsaka tafarlaust mál Floyds. Trump færði fjölskyldu Floyds dýpstu samúðarkveðjur bandarísku þjóðarinnar. Margir fjölmiðlar hafa ekki greint frá þessu en eru fullir frásagna um „rasisma hvíta ofurstofnsins” sem Trump er gerður að fulltrúa fyrir og virðist ofbeldi, skemmdarverk, búðarrán og jafnvel morð talin vera „friðsamleg mótmæli gegn rasisma”.
Ósannindum dreift um að lögreglan hefði troðið niður mótmælendur og notað táragas til að ryðja veg fyrir forsetann að kirkju St. John
Reuters og fleiri miðlar eins og t.d. New York Times, MSNBC, ABC, Washington Post, NPR,CNN ásamt fleirum dreifðu sögum um að lögreglusveitir hefðu hreinsað leiðina fyrir forsetann áður en hann gekk að St. John kirkjunni, þar sem mynd var tekin af honum með biblíuna í hendinni. Var forsetanum lýst sem stríðsóðu skrímsli sem sendi lögreglumenn til að berja á friðsömum mótmælendum og ryðja þeim burtu með táragasi. Fóru þessar fréttir út um allan heim en sannleikurinn er sá að ekki einu sinni myndband frá Reuters sýndi neitt táragas sjá myndband hér að neðan.
Einstaka greindu þó satt og rétt frá eins og blaðamaðurinn Neal Augenstein WTOP sem hafði eftir lögreglunni „að ekkert táragas hefði verið notað til að koma fólki í burtu heldur hafði lögreglan notast við „reykdósir og piparúða”. Molly Hemingway hjá The Federalist skrifar að ef satt væri að lögreglan hefði beitt táragasi
„þá væri það í fyrsta sinn í sögunni sem lögreglumenn hefðu notað táragas án gasgríma á svæði sem forseti Bandaríkjanna gekk um mínútum síðar.”
Ýmsir fjölmiðlar og tæknirisar hafa lýst því yfir að þeir muni gera allt til að koma í veg fyrir að Donald Trump verði endurkjörinn forseti Bandaríkjanna. Fellur boðskapur þeirra saman við áróður kínverska kommúnistaflokksins gegn Bandaríkjunum og Donald Trump og virðist mikið af falsboðskapnum sem birtist á Vesturlöndum gegn Bandaríkjastjórn og forsetanum vera sóttur í síður aðalmálgagns Kommúnistaflokks Kína Global Times. Margir telja að markmiðið með öllum þessum áróðri sé að heilaþvo fólk og telja því trú um að Trump sé ábyrgur alls ills í heiminum og að einungis Demókrataflokkurinn geti bjargað málunum.
